ဧရာဝတီတိုင်းဒေသကြီး လေးမျက်နှာမြို့တွင် ရေဝင်ရောက်မှုမှာ ဩဂုတ်လ ၂၄ ရက်နံနက်ပိုင်းအထိ ၅ ပေ ၈ လက်မခန့် ကျဆင်းလာပြီဖြစ်သဖြင့် မြို့တွင်းသို့ သွားရောက်နိုင်မည့် လမ်းကြောင်းများနှင့် အသုံးပြုနိုင်တဲ့ ယာဉ်အမျိုးအစားများကို အသိပေးထုတ်ပြန်ထားကြောင်း သိရပါတယ်။ လက်ရှိမြေပြင်အခြေအနေအရ ကျုံပျော်-ရှားခဲ-နိဗ္ဗာန်-ဟင်္သာတ လမ်းကြောင်းကို ကားဖြင့် သွားလာနိုင်ပြီ ဖြစ်သလို နိဗ္ဗာန်-ယုန်သလင်း-ခမောက်စု လမ်းကြောင်းကိုလည်း ကားဖြင့် သွားလာနိုင်ပြီး ခမောက်စုမှ အိုင်သပြုသို့ စက်လှေနဲ့ ဆက်လက်သွားရောက်နိုင်ကြောင်း Information Center များ၏ ဖော်ပြချက်ကို ကိုးကား၍ တိုင်းဒေသကြီး အစိုးရအဖွဲ့က ပြန်လည်အသိပေးထားပါတယ်။ ဒါ့အပြင် ဟင်္သာတ-တလုတ္ထော်-သင်္ကန်းတော-လဟာပ-စာရေးကွင်း လမ်းကြောင်းမှာ ခြောက်ဘီးယာဉ်များနဲ့ သွားလာနိုင်ပြီး ဟင်္သာတ-တလုတ္ထော်-သင်္ကန်းတော-အုတ်ပုံ-ဇရပ်ကွင်း လမ်းကြောင်းတွင် ယာဉ်အလတ်စားများဖြင့် သွားလာနိုင်ကြောင်း သိရပါတယ်။ အလားတူ ဟင်္သာတ-တလုတ္ထော်ရပ်ကွက်(၂)-တမိုင်-ကြပ်ပြေး-အုတ်ပုံ လမ်းကြောင်းကို ကားငယ်များဖြင့် သွားလာနိုင်ကာ ဟင်္သာတ-တလုတ္ထော်-မြို့ကွင်းတံတား-ခြောက်ရွာ-ကျွဲသောင်-မှန်ကုန်းလမ်းမှတစ်ဆင့် ဆိတ်နို့ကုန်း-လေးမျက်နှာတံတားသို့လည်း ကားများဖြင့် သွားလာနိုင်ကြောင်း ထုတ်ပြန်ထားပါတယ်။ သို့သော် မြစ်ရေအတက်အကျပေါ်မူတည်၍ လက်ရှိသွားလာနိုင်တဲ့ လမ်းကြောင်းများ ပြောင်းလဲနိုင်သဖြင့် လေးမျက်နှာမြို့နယ်ရှိ ရေဘေးသင့်ပြည်သူများထံ သွားရောက်ကူညီလှူဒါန်းမည့် ပရဟိတအဖွဲ့များနှင့် အလှူရှင်များ အနေနဲ့ ဘေးအန္တရာယ်ကင်းရှင်းစေရေးနှင့် အကူအညီများ အမှန်တကယ်လိုအပ်သည့် နေရာများသို့ ထိရောက်စွာ ရောက်ရှိနိုင်ရေးအတွက် ဒေသရှိ ကွပ်ကဲရေးအဖွဲ့များနှင့် ကြိုတင်ချိတ်ဆက်၍ သတ်မှတ်လမ်းညွှန်ချက်များအတိုင်း ပူးပေါင်းဆောင်ရွက်ကြရန် မေတ္တာရပ်ခံထားကြောင်း သိရပါတယ်။ (NVS 008)