မြန်မာနိုင်ငံ၏ ဟိုတယ်နှင့်ခရီးသွားလာရေးလုပ်ငန်းများ ပိုမိုဖွံ့ဖြိုးတိုးတက်လာစေရန်နှင့် နိုင်ငံတကာ ခရီးသွားဧည့်သည်တော်များကိုအဆင့်မီဝန်ဆောင်မှုများ ပေးနိုင်ရန်ရည်ရွယ်၍ ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန၏ ကြီးကြပ်မှုနဲ့ တရုတ်အစားအစာချက်ပြုတ်နည်းသင်တန်း (Chinese Culinary Training) ဖွင့်ပွဲအခမ်းအနားကို ဇူလိုင်လ ၅ ရက်နံနက်ပိုင်းမှာ ပြင်ဦးလွင်မြို့ရှိ ပန်သစ္စာဟိုတယ်၌ စည်ကားသိုက်မြိုက်စွာ ကျင်းပပြုလုပ်ခဲ့ကြောင်း သိရပါတယ်။ ယခုသင်တန်းက တရုတ်ပြည်သူ့သမ္မတနိုင်ငံ ယူနန်ပြည်နယ် ကူမင်းမြို့အခြေစိုက် Kunming Vocational University of Science and Technology ၏ အနီးကပ်ပူးပေါင်းစီစဉ်မှုဖြင့် ပေါ်ပေါက်လာခြင်းဖြစ်ပြီး၊ ဖွင့်ပွဲ အခမ်းအနားသို့ ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာန ဒုတိယဝန်ကြီး ဦးဖြိုးဇော်စိုး တက်ရောက်ကာ သင်တန်းဆိုင်ရာ လမ်းညွှန်အမှာစကား ပြောကြားခဲ့ပါတယ်။ အခမ်းအနားမှာ ဖူးကျင့်နိုင်ငံတကာဘာသာစကား သင်တန်းကျောင်းမှ ကျောင်းအုပ်ကြီးက မီဒီယာများနှင့်တက်ရောက်လာသူများကို ယခုကဲ့သို့တရုတ်ရိုးရာ အချက်အပြုတ် အတတ်ပညာသင်တန်းဖွင့်လှစ်ရခြင်း၏ ရည်ရွယ်ချက်များနှင့် နောင်တွင်ဆက်လက်ဖွင့်လှစ် ဆောင်ရွက်သွားမည့် ရှေ့လုပ်ငန်းစဉ် အခြေအနေများကို အသေးစိတ် ရှင်းလင်းတင်ပြခဲ့သည်။ (NVS 008)