ပုဂံရှေးဟောင်းယဉ်ကျေးမှုနယ်မြေရှိ မဟာဗောဓိဘုရား၌ (၁၃) ရာစုခေတ် နံရံပန်းချီဆေးသားလွှာ အထောက်အထားသစ်များကို အိန္ဒိယနိုင်ငံ ရှေးဟောင်းသုတေသနဌာန (Archaeological Survey of India – ASI) မှ ကျွမ်းကျင်ပညာရှင်များက ထပ်မံဖော်ထုတ်တွေ့ရှိခဲ့ကြောင်း သိရပါတယ်။ ASI အဖွဲ့သည် ရှေးဟောင်းအဆောက်အအုံအမှတ် (၁,၆၇၀) ဖြစ်တဲ့ မဟာဗောဓိဘုရားအပေါ်ထပ် ဂန္ဓကုဋိ တိုက်အတွင်းပိုင်း ထုံးသားလွှာအောက်တွင် နံရံပန်းချီများ ရှိ၊ မရှိကို နမူနာအကွက်ငယ် ၁၃ ကွက်နဲ့ စမ်းသပ်စစ်ဆေး ခဲ့ရာ အရှေ့ဘက်နံရံမှာ ထင်ရှားသော နံရံပန်းချီ ၁ ကွက်နှင့် တောင်ဘက်၊ မြောက်ဘက် နံရံများတွင် ဆေးသား မှိန်နေတဲ့ နံရံပန်းချီ ၁ ကွက်စီ စုစုပေါင်း ၃ ကွက်မှ နံရံပန်းချီဆေးသားလွှာများကို ဖော်ထုတ်တွေ့ရှိခဲ့ခြင်း ဖြစ်ကြောင်း သိရပါတယ်။ အခုလိုထပ်မံဖော်ထုတ်တွေ့ရှိမှုကြောင့် ၁၃ ရာစုလက်ရာ မဟာဗောဓိဘုရားမှာ နံရံပန်းချီ များတည်ရှိကြောင်း အတည်ပြုနိုင်ခဲ့ပြီး ပုဂံဒေသရှိ နံရံပန်းချီပါ ရှေးဟောင်းဘုရားတစ်ဆူ ထပ်မံတိုးလာခဲ့ပါတယ်။ သက်ဆိုင်ရာတာဝန်ရှိသူများ မဟာဗောဓိဘုရားကို နိုင်ငံဖြတ်ကျော် ပူးတွဲအဆိုပြု ကမ္ဘာ့အမွေအနှစ်စာရင်း တင်သွင်းနိုင်ရေး စီစဉ်ဆောင်ရွက်လျက်ရှိပြီး ဘုရားအတွင်းရှိ နံရံပန်းချီများကိုလည်း ဆက်လက်ဖော်ထုတ် ထိန်းသိမ်းသွားမည်ဖြစ်ကြောင်း သိရပါတယ်။ (NVS 008)