ကမ္ဘာ့ဘောလုံးအဖွဲ့ချုပ်(FIFA)က ကမ္ဘာ့ဖလားပြိုင်ပွဲဝင် အီဂျစ်အသင်းဝတ်ဆင်မယ့် ဂျာစီအင်္ကျီမှာ ကြယ်ခုနစ်ပွင့်တပ်ဆင်ထားတာကို ဖယ်ရှားပေးဖို့ ညွှန်ကြားခဲ့ပါတယ်။ အီဂျစ်ဘောလုံးအဖွဲ့ချုပ်က FIFA ကနေ အကြောင်းကြားလာမှုကို အတည်ပြုပြောကြားခဲ့တာ ဖြစ်ပါတယ်။ အီဂျစ်အသင်းဟာ အာဖရိကနိုင်ငံများဖလားပြိုင်ပွဲမှာ ချန်ပီယံဆု ခုနစ်ကြိမ်ရရှိထားတဲ့ အထိမ်းအမှတ် အဖြစ် ဂျာစီရဲ့အသင်းလိုဂိုအပေါ်ဘက်မှာ ကြယ်ခုနစ်ပွင့် ထည့်သွင်းခဲ့ပါတယ်။ ဒါပေမယ့် ယင်းအမှတ်အသားမှာ ဒေသတွင်းပြိုင်ပွဲ ဗိုလ်စွဲထားတာဖြစ်ပြီး ယခုပြိုင်ပွဲဟာ ကမ္ဘာ့ဖလားပြိုင်ပွဲဖြစ်လို့ ကြယ်ခုနစ်ပွင့်ကို ဖယ်ရှားပေးဖို့ FIFA က ညွှန်ကြားခဲ့တာဖြစ်ပါတယ်။ FIFA ဟာ ကမ္ဘာ့ဖလားချန်ပီယံ ဖြစ်ဖူးတဲ့အသင်းတွေကို ဂျာစီပေါ် ကြယ်တပ်ဆင်ခွင့် ပြုထားပါတယ်။ ဒါ့အပြင် အီဂျစ်အသင်းဟာ ကစားသမားတွေရဲ့ နံပါတ်ကိုလည်း မူလဒီဇိုင်းဖြစ်တဲ့ ရွှေရောင်အစား အဖြူရောင်ကိုပြောင်းလဲပေးဖို့ FIFA က ညွှန်ကြားလာတာကြောင့် ပြင်ဆင်ခဲ့ရပါတယ်။ (NVS 008)