အမေရိကန်စစ်ဘက်က အိုမန်ပင်လယ်ကွေ့၌ အိန္ဒိယသင်္ဘောသားများကို တင်ဆောင်လာသည့် ကုန်တင် သင်္ဘောများကို တိုက်ခိုက်မှုနှင့်ပတ်သက်၍ အိန္ဒိယအစိုးရက အမေရိကန်နိုင်ငံအပေါ် ပြင်းပြင်းထန်ထန် ကန့်ကွက် လိုက်ကြောင်းသိရသည်။ အိန္ဒိယပြည်ပရေးရာဝန်ကြီး ဆူဘရာမန် ယမ်ဂျေရှန်ကာ က အမေရိကန်နိုင်ငံခြားရေး ဝန်ကြီး မာကိုရူဘီယို နှင့်စကားပြောစဉ် ယခုကဲ့သို့ကန့်ကွက်ကြောင်းပြောခြင်း ဖြစ်သည်။ ပင်လယ်ကွေ့ဒေသအတွင်း အမေရိကန်၏ တိုက်ခိုက်မှုများကြောင့် အိန္ဒိယနိုင်ငံမှ သင်္ဘောသားသုံးဦး သေဆုံးခဲ့ရကြောင်း၊ ကုန်သွယ်ရေးသင်္ဘောများအပေါ် ယခုကဲ့သို့ လူသေဆုံးမှုဖြစ်စေသည်အထိ တိုက်ခိုက်မှုများက လက်ခံနိုင်ဖွယ်မရှိကြောင်း ဂျေရှန်ကာ က ဇွန်လ ၁၃ ရက်တွင် လူမှုကွန်ရက်၌တင်ထားခြင်းဖြစ်သည်။ အမေရိကန်စစ်ဘက်သည် အီရန်နိုင်ငံ အပေါ်ပိတ်ဆို့ထားမှုများကို ချိုးဖောက်မှုလုပ်သည့် သင်္ဘောများကို တိုက်ခိုက်မှုများ လုပ်ခြင်းဖြစ်ကြောင်းပြောသည်။ ဇွန်လ ၈ ရက်တွင် ပလောနိုင်ငံအလံလွှင့်ထားသော ရေနံတင် သင်္ဘောကို တိုက်ခိုက်မှုလုပ်ရာ အိုမန်တာဝန်ရှိသူများက အိန္ဒိယသင်္ဘောသား ၂၄ ဦးကိုကယ်ဆယ်ခဲ့ရသည်။ ဇွန်လ ၁၀ ရက်တွင် ပလောနိုင်ငံအလံလွှင့်တင်ထားသော နောက်ထပ်သင်္ဘောတစ်စင်းကို တိုက်ခိုက်ရာ အိန္ဒိယသင်္ဘောသား သုံးဦးသေဆုံးသည်။ ဇွန်လ ၁၁ ရက်တွင်မူ ဂီနီဘစ်ဆောအလံလွှင့်ထားသည့် ရေနံတင်သင်္ဘောကို အမေရိကန်က တိုက်ခိုက်ရာ ထိုသင်္ဘောတွင် အိန္ဒိယသင်္ဘောသားဦးရေ ၂၀ ပါဝင်ကြောင်းသိရသည်။