အိန္ဒိယနိုင်ငံမြို့တော် နယူးဒေလီ Malviya Nagar ဒေသရှိ စားသောက်ဆိုင်တစ်ဆိုင်တွင် ဇွန်လ ၃ ရက် နံနက်ပိုင်းက ဖြစ်ပွားခဲ့သောမီးလောင်မှုကြောင့် နိုင်ငံခြားသား ၁၈ ဦး အပါအဝင် လူ ၂၁ ဦး သေဆုံးခဲ့ကြောင်း အိန္ဒိယမီဒီယာများက ဖော်ပြခဲ့သည်။ သေဆုံးသွားသော နိုင်ငံခြားသားများသည် ဘင်္ဂလားဒေ့ရှ်၊ နိုင်ဂျီးရီးယား၊ မိုဇမ်ဘစ်နှင့် လိုက်ဘေးရီးယား နိုင်ငံမှဖြစ်ကြောင်း သတင်းတွင် ဖော်ပြထားသည်။ မီးလောင်မှုကြောင့် လူ ၄၀ ကျော် ဒဏ်ရာရရှိခဲ့ပြီး ၎င်းတို့ကို ဒေသန္တရဆေးရုံများသို့ ပို့ဆောင်ကုသပေးခဲ့သည်။ အဆိုပါစားသောက်ဆိုင်သည် ဆေးကုသရေးစင်တာတစ်ခုနှင့် နီးကပ်ပြီး လုပ်ငန်းလည်ပတ်မှုတွင် လူနာနှင့် မိသားစုများအတွက် နေရာထိုင်ခင်းပေးအပ်သည့် ဝန်ဆောင်မှုများလည်းပါဝင်ကြောင်း သတင်းတွင် ဖော်ပြထား သည်။ အိန္ဒိယနိုင်ငံ သက်ဆိုင်ရာစည်းမျဉ်းစည်းကမ်းများအရ ဤစားသောက်ဆိုင်အား အခန်း ၆ ခန်းသာ ဖွင့်လှစ်ရန် ခွင့်ပြုထားသော်လည်း အခင်းဖြစ်ပွားချိန်တွင် အခန်း ၂၅ ခန်း ဖွင့်လှစ်ထားရာ တည်းခိုသူဦးရေမှာ သတ်မှတ်ထား သည်ထက် များစွာကျော်လွန်နေခဲ့သည်ဟု သတင်းရင်းမြစ်များက ပြောကြားခဲ့သည်။ လက်ရှိတွင် စားသောက်ဆိုင် ပိုင်ရှင်မှာ ထွက်ပြေးတိမ်းရှောင်နေပြီး အခင်းဖြစ်ပွားသည့်အကြောင်းရင်းကို စုံစမ်းစစ်ဆေးနေဆဲဖြစ်ကြောင်း သိရသည်။ အိန္ဒိယနိုင်ငံသမ္မတ Droupadi Murmu က သေဆုံးသူများ၏ မိသားစုဝင်များနှင့်အတူ ထပ်တူ ဝမ်းနည်းကြောင်း ဆိုရှယ်မီဒီယာတွင် ရေးသားဖော်ပြခဲ့သည်။ ဤမီးလောင်မှုတွင် တရုတ်နိုင်ငံသား သေဆုံးဒဏ်ရရှိမှု မရှိကြောင်း အိန္ဒိယနိုင်ငံဆိုင်ရာ တရုတ်သံရုံးက ဆင်ဟွာသတင်းဌာနကို အတည်ပြုပြောကြားခဲ့သည်။ (Repost from Xinhua)