လက်ရှိမော်တော်ကားရောင်းဝယ်ရေးဈေးကွက်အတွင်း မော်တော်ကားများကို ပြည်တွင်းအခွန်ဦးစီးဌာနက သတ်မှတ်ထားသော စည်းကြပ်ခွန်စံနှုန်းတန်ဖိုးများထက် အဆမတန်မြင့်မားသော ဈေးနှုန်းများနဲ့ ရောင်းဝယ်နေခြင်း များအပေါ် သက်ဆိုင်ရာဝန်ကြီးဌာနအနေနဲ့ စီမံကြပ်မတ်ဆောင်ရွက်ရန် အစီအစဉ်ရှိ၊ မရှိကို တာချီလိတ်မဲဆန္ဒနယ်မှ ဦးကျော်ငြိမ်းအောင်က တတိယအကြိမ်ပြည်သူ့လွှတ်တော် ဒုတိယပုံမှန်အစည်းအဝေးပထမနေ့မှာ မေးမြန်းခဲ့ပါတယ်။ ဦးကျော်ငြိမ်းအောင်က ပြည်တွင်းအခွန်ဦးစီးဌာန၏ ၂၀၂၄ ခုနှစ် ဇန်နဝါရီလ ၁ ရက်ထုတ် မော်တော်ကား စည်းကြပ်ခွန်စာရင်းဇယားအရ Toyota Mark II Saloon 2000 CC 2004 မော်ဒယ်ကားတစ်စီးကို ကျပ်သိန်း ၄၀၀ နဲ့ အခွန်စည်းကြပ်ထားပေမယ့် လက်ရှိပြင်ပဈေးကွက်မှာ အဆိုပါကားအမျိုးအစားမှာ ကျပ်သိန်း ၉၀၀ ကျော်အထိ ပေါက်ဈေးရှိနေကြောင်း ထောက်ပြပြောကြားခဲ့ပါတယ်။ အဆိုပါကားဈေးနှုန်းများ မြင့်တက်နေခြင်းကြောင့် ပြည်သူ များအနေနဲ့ အိမ်သုံးနှင့် လုပ်ငန်းသုံး မော်တော်ယာဉ်များ ဝယ်ယူအသုံးပြုရာတွင် အခက်အခဲများ ကြုံတွေ့နေရသလို၊ နယ်စပ်ဒေသများမှ မြို့ကြီးများအထိ လိုင်စင်မဲ့ကားများကို ဥပဒေနှင့်မညီဘဲ ရွေးချယ်အသုံးပြုနေသူများလည်း ရှိလာကြောင်း ပြောကြားခဲ့ပါတယ်။ အဆိုပါမေးခွန်းနှင့်ပတ်သက်၍ ဘဏ္ဍာရေးနှင့်အခွန်ဝန်ကြီးဌာန ဒုတိယဝန်ကြီး ဦးဟန်ဝင်းအောင်က ပြန်လည်ဖြေကြားရာမှာ ပြည်တွင်းအခွန်များဦးစီးဌာနအနေနဲ့ မော်တော်ယာဉ်ဝယ်ယူရောင်းချမှုများအပေါ် အခွန်စည်းကြပ်ရာမှာ တစ်ပြေးညီဖြစ်စေရန် နှစ်စဉ်စံနှုန်းတန်ဖိုးများကို ကြိုတင်သတ်မှတ်ဆောင်ရွက်ထားကြောင်း ပြောကြားခဲ့ပါတယ်။ အဆိုပါစံနှုန်းတန်ဖိုးများမှာ အခွန်ထမ်းပြည်သူများ ဝန်ထုပ်ဝန်ပိုးမဖြစ်စေရန်နှင့် မိမိဆန္ဒအလျောက် အခွန်ပေးဆောင်နိုင်စေရန် ရည်ရွယ်သတ်မှတ်ထားခြင်းဖြစ်ပြီး၊ မော်တော်ယာဉ်ဈေးနှုန်း အတက်အကျအခြေအနေ များကြောင့် ပြင်ပပေါက်ဈေးနှုန်းနှင့် စံနှုန်းတန်ဖိုးများအကြား ကွာဟမှုများရှိနိုင်ကြောင်း ပြောကြားခဲ့ပါတယ်။ ဒါ့အပြင် မော်တော်ယာဉ်စံနှုန်းတန်ဖိုးများကို ခြောက်လတစ်ကြိမ် ပြန်လည်သုံးသပ်သွားမည်ဖြစ်ပြီး၊ ပြည်သူများ ပိုမိုလွယ်ကူစွာ အခွန်ပေးဆောင်နိုင်စေရန်နှင့် ပွင့်လင်းမြင်သာမှုရှိစေရန် BAPS စနစ်ကို အွန်လိုင်းမှတစ်ဆင့် အသုံးပြု နိုင်ရေး စီစဉ်ဆောင်ရွက်နေကြောင်းလည်း ဒုတိယဝန်ကြီးက ပြောကြားခဲ့ပါတယ်။ (NVS 004)