(၈၁) နှစ်မြောက် တပ်မတော်နေ့ကို ကြိုဆိုဂုဏ်ပြုသောအားဖြင့် ဆိုလာစနစ်နဲ့ ငမိုးရိပ်လျှပ်စစ် မြစ်ရေတင် နှင့် ကျေးရွာမီးလင်းရေးစီမံကိန်းဖွင့်ပွဲအခမ်းအနားကို မတ်လ ၁၀ ရက်က ရန်ကုန်တိုင်းဒေသကြီး၊ လှည်းကူးခရိုင်၊ လှည်းကူးမြို့နယ်၊ မုဆိုးညောင်ပင်ကျေးရွာမှာ ကျင်းပခဲ့ရာ အခမ်းအနားသို့ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း၊ တိုင်းဒေသကြီးအစိုးရအဖွဲ့ဝင်များ၊ ဌာနဆိုင်ရာအကြီးအကဲများ၊ ခရိုင်/မြို့နယ် စီမံခန့်ခွဲရေးနှင့် အုပ်ချုပ်ရေး ကော်မတီဥက္ကဋ္ဌနှင့် အဖွဲ့ဝင်များ၊ ပြည်သူများနှင့် တာဝန်ရှိသူများ တက်ရောက်ခဲ့ကြပါတယ်။ ဆိုလာစနစ်နဲ့ ငမိုးရိပ်လျှပ်စစ်မြစ်ရေတင်နှင့် ကျေးရွာမီးလင်းရေးစီမံကိန်းဖွင့်ပွဲကို ရန်ကုန်တိုင်းဒေသကြီး စီးပွားရေးရာဝန်ကြီး ဦးမျိုးမြင့်အောင်၊ ရန်ကုန်တိုင်းဒေသကြီး၊ ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန၊ ညွှန်ကြားရေးမှူး ဦးကျော်နိုင်ဦး၊ လှည်းကူးခရိုင်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးကျော်ဝင်းလှိုင်နှင့် တာဝန်ရှိသူများက ဖဲကြိုးဖြတ်ဖွင့်လှစ်ပေးခဲ့ကြပါတယ်။ ယခုတည်ဆောက်ဖွင့်လှစ်တဲ့ ငမိုးရိပ်ဆိုလာရေတင်လုပ်ငန်းမှာ မူလက 250 Kw မော်တာနှင့် ၄၀ ကျူဆက်ပန့် ၆ စုံကိုတပ်ဆင်ပြီး မဟာဓာတ်အားလိုင်းမှ လျှပ်စစ်နဲ့ရေပေးဝေခဲ့ရာမှ ၂၀၂၅-၂၀၂၆ ဘဏ္ဍာရေးနှစ်မှာ 720 W ဆိုလာ အချပ်ရေ ၁,၀၇၈ ချပ် ၁၄ ချပ် String ၇၇ ခုကိုတပ်ဆင်၍ ရေမောင်း နှင်ရန်အတွက် (0.4/11 kV) 110 kW Ongrid Inverter ၇ လုံးမှ 750 Kw ကိုထုတ်လုပ်ရာ 750 KVA Step-up Transformer ၁ လုံးနဲ့ မီးအားမြှင့်တင်ပြီး (250 Kw) မော်တာနှင့် ၄၀ ကျူဆက်ပန့် ၆ စုံတို့ကိုနေ့အချိန်မှာ လျှပ်စစ်+ ဆိုလာစနစ်နဲ့ စုစုပေါင်း ၃,၄၅၄ ဧကကို ရေပေးဝေနိုင်မည်ဖြစ်ကြောင်းနှင့် စိုက်ပျိုးရေထပ်မံလိုအပ်ပါက ညပိုင်းမှည လျှပ်စစ်ဓာတ်အားဖြင့် မောင်းနှင်၍ ပေးဝေနိုင်မည်ဖြစ်ကြောင်း သိရပါတယ်။ (NVS 004)