ဖေဖော်ဝါရီလ ၂၃ ရက်က စတင်ကျင်းပသော နှစ်ဆုံးတတ်မြောက်မှုစစ်ဆေးခြင်း Grade-5 နှင့် Grade-9 ကျောင်းသား၊ကျောင်းသူ ၁၆၁ ဦးနှင့်ပတ်သက်၍ ဖြစ်စဉ်အမှန်အား ဖေဖော်ဝါရီလ ၂၄ ရက်က ထုတ်ပြန်ကြေညာ ခဲ့ပါတယ်။ အဆိုပါ Grade-5 ကျောင်းသား၊ ကျောင်းသူ ၇၂ ဦးနှင့် Grade-9 ကျောင်းသား၊ ကျောင်းသူ ၈၉ ဦး စုစုပေါင်း ၁၆၁ ဦးတို့သည် ကျောင်းအပ်နှံစာရင်းတွင် ပါဝင်မှုမရှိခြင်း၊ ကျောင်းသားလချုပ်စာရင်းမှာ ပါဝင်မှုမရှိခြင်း၊ နှစ်ဆုံးစာမေးပွဲဖြေဆိုသူစာရင်း(သွင်းစာရင်း)မှာ ပါဝင်မှုမရှိခြင်း၊ ၎င်းကျောင်းသို့ ပညာရေးဝန်ကြီးဌာနမှ တာဝန်ရှိသူများ သွားရောက်စစ်ဆေးချိန်မှာလည်း ဖော်ပြပါကျောင်းသားများက အမှန်တကယ် ကျောင်းတက်ရောက်မှုမရှိခြင်း၊ အခန်းဆုံးနှင့် နှစ်ဝက်ဆုံးတတ်မြောက်မှု စစ်ဆေးခြင်း ၃ ကြိမ်ဖြေဆိုထားတဲ့ အထောက်အထားများမရှိခြင်းကြောင့် မူဝါဒအရ စာမေးပွဲဖြေဆိုခွင့် မရရှိခြင်းဖြစ်ပါတယ်။ အခုလို ဖြေဆိုခွင့်မရှိတဲ့ကျောင်းသားများကို စစ်ကိုင်းခရိုင် ပညာရေးမှူးက ဖြေဆိုခွင့်ကတ်ပြားများကို ဖေဖော်ဝါရီလ ၂၂ ရက်မှာ ထုတ်ပေးခဲ့ကြောင်း စိစစ်တွေ့ရှိခဲ့တာ ဖြစ်ပါတယ်။ ဒါ့အပြင် ၎င်းတို့တက်ရောက်သင်ကြားနေသော “ထက်”ကိုယ်ပိုင်အထက်တန်းကျောင်းဟာ ပုဂ္ဂလိက ပညာရေးဥပဒေပုဒ်မ ၃၁၊ ပုဒ်မခွဲ(ဋ) နှင့် ပုဒ်မခွဲ(ဍ) မှာသတ်မှတ်ထားသော စည်းမျဉ်းစည်းကမ်းများကို ဖောက်ဖျက် ကျူးလွန်ခဲ့ခြင်းကြောင့် ၂၀၂၆-၂၀၂၇ ပညာသင်နှစ်မှစ၍ ပိတ်သိမ်းရန်ဆုံးဖြတ်ထားတဲ့ ကျောင်းဖြစ်ကြောင်း ထုတ်ပြန်ချက်အရ သိရပါတယ်။ အဆိုပါကျောင်းမှာ အမှန်တကယ်တက်ရောက်ပြီး စာရင်းသွင်းထားသော ကျောင်းသား၊ ကျောင်းသူများ နစ်နာမှုမရှိစေရန် ၂၀၂၅-၂၀၂၆ ပညာသင်နှစ် နှစ်ကုန်အထိခွင့်ပြုပေးခဲ့ပြီး အခန်းဆုံးတတ်မြောက်မှု စစ်ဆေးခြင်း ၂ ကြိမ်၊ နှစ်ဝက်ဆုံးတတ်မြောက်မှု စစ်ဆေးခြင်း ၁ ကြိမ် ဖြေဆိုခဲ့သည့် Grade-5 ကျောင်းသား၊ ကျောင်းသူ ၄၀ ဦးနှင့် Grade-9 ကျောင်းသား၊ ကျောင်းသူ ၄၀ ဦး စုစုပေါင်း ၈၀ ဦးတို့ကို ယခုကျင်းပလျက်ရှိသော နှစ်ဆုံးတတ်မြောက်မှု စစ်ဆေးခြင်းမှာ ဖြေဆိုခွင့်ပြုခဲ့ပါတယ်။ ဒါကြောင့် ဖေဖော်ဝါရီလ ၂၃ ရက်က စတင်ကျင်းပသော နှစ်ဆုံးတတ်မြောက်မှုစစ်ဆေးခြင်း စာစစ်ဌာနသို့ သွားရောက်ဖြေဆိုရာမှာ ဖြေဆိုခွင့်မရရှိခဲ့တာဖြစ်ပါတယ်။ သတ်မှတ်ချက်နှင့်ကိုက်ညီမှုမရှိသော ကျောင်းသားများကို စစ်ကိုင်းခရိုင်ပညာရေးမှူးအား ဖြေဆိုခွင့်ကတ်ပြားများကို ထုတ်ပေးခဲ့ခြင်းနှင့်ပတ်သက်၍ နိုင်ငံ့ဝန်ထမ်းနည်းဥပဒေ များနှင့်အညီ စိစစ်ဆောင်ရွက်သွားမှာဖြစ်ကြောင်း သတင်းထုတ်ပြန်ခဲ့ပါတယ်။ (NVS 004)