စစ်ကိုင်းဒေသကြီး၊ မုံရွာမြို့၌ အပန်းဖြေလိုသူများ၊ ညဘက်စျေးဝယ်လိုသူများအတွက် ကန်သာယာညစျေး (Night Market)ကို အရှေ့ဘက်ကန်သာယာ တောင်ဘက်ကွင်းမှာ ၁၂ ပေပတ်လည်ရှိ စျေးဆိုင်ခန်းပေါင်း ၁၁၀ ခန်း တည်ဆောက်ပြီး ဖွင့်လှစ်ပေးတော့မှာ ဖြစ်ကြောင်း သိရပါတယ်။ အရှေ့ဘက်ကန်သာယာရဲ့ တောင်ဘက်ကွင်း၌ စျေးဆိုင်ပေါင်း ၁၁၀ ကို ညစျေးအဖြစ် ခင်းကျင်းရောင်းချ ပေးမှာဖြစ်တဲ့အပြင် ဖျော်ဖြေရေးအစီအစဥ်များပါ ဆောင်ရွက်ပေးမည်ဖြစ်၍ နေ့ပိုင်းမအားလပ်သူများ၊ ဝန်ထမ်းများ၊ ညပိုင်းအပန်းဖြေလိုသူများအတွက် တေးသံသာများနှင့်အတူ ကန်သာယာ ၏ ညရှုခင်းကိုခံစားရင်း လိုအပ်တဲ့ စားသောက်ကုန်များကို ဝယ်ယူနိုင်မှာ ဖြစ်ပါတယ်။ မုံရွာမြို့၊ ချင်းတွင်းရတနာစျေး၊ သာစည်စျေး၊ ဗန္ဓုလစျေး၊ အောင်ချမ်းသာစျေးစတဲ့ စျေးများမှာ ဒေသထွက်ကုန်များ၊ စားသောက်ကုန်များ၊ အဝတ်အထည်များကို နေ့ဘက်မှာသာ ဖွင့်ပေးသဖြင့် နေ့ပိုင်းတွင် အလုပ်လုပ်နေသူများ၊ ဝန်ထမ်းများ၊ နေ့ပိုင်းမအားလပ်သူများအတွက် စျေးဝယ်ယူရန် အခက်အခဲဖြစ်လျက်ရှိပါတယ်။ ဒါ့အပြင် မုံရွာမြို့၊ ဘုန်းစိုးရပ်ကွက်၊ ကျောက္ကာလမ်းရှိ မော်တော်ယာဥ်ရောင်းဝယ်ယူရေးစင်တာကိုလည်း မကြာမီဖွင့်လှစ်တော့မည်ဖြစ်ရာမော်တော်ယာဥ်ရောင်းဝယ်ရေးစင်တာတွင် ပင်မအဆောက်အဦး ၄ ခုပါရှိပြီး ဆိုင်ခန်း ပေါင်း ၄၁ ခန်းပါရှိပါတယ်။ စင်တာတွင်မော်တော်ကားပစ္စည်းနှင့် ကားအလှဆင်ပစ္စည်းအရောင်းဆိုင် ၁၀ ဆိုင်၊ မော်တော်ယာဥ်ပြုပြင်ရေးလုပ်ငန်း ၈ ခု၊ ကားရေဆေးဆီလိုက်လုပ်ငန်း ၁ ခု၊ မော်တော်ဆိုင်ကယ်နှင့် ဆက်စပ်ပစ္စည်း အရောင်းဆိုင် ၈ ဆိုင်၊ စားသောက်ဆိုင် ၉ ဆိုင်၊ ဆံသနှင့်အလှပြင်ဆိုင် ၁ ဆိုင်တို့ကို ဖွင့်လှစ်သွားမှာ ဖြစ်ပါတယ်။ (NVS 004)