အာဆင်နယ်အသင်းဟာ လန်ဒန်ပြိုင်ဘက် ချဲလ်ဆီးအသင်းရဲ့ အင်္ဂလန်တောင်ပံတိုက်စစ်မှူး မာဒူကီ ကို ပြောင်းရွှေ့ကြေး ပေါင် ၄၈ သန်းခွဲ နဲ့ ခေါ်ယူလိုက်ကြောင်း သိရပါတယ်။ အသက် ၂၃ နှစ်အရွယ် မာဒူကီ ဟာ ၂၀၂၅ ကလပ်ကမ္ဘာ့ဖလားချန်ပီယံ ချဲလ်ဆီးအသင်းမှာ ပါဝင်ခဲ့သူဖြစ်ပြီး အာဆင်နယ်အသင်းနဲ့ ၅ နှစ်စာချုပ် ချုပ်ဆိုခဲ့ပါတယ်။ အာဆင်နယ်အသင်းထံသို့ အပြောင်းအရွှေ့ဖြစ်လာအောင် ကူညီပေးခဲ့ကြသူများကို ကျေးဇူးတင်ရှိကြောင်း အသင်းသစ်နဲ့ စာချုပ်ချုပ်ဆိုအပြီးမှာ မာဒူကီ က ပြောခဲ့ပါတယ်။ ၂၀၂၃ မှာ PSV အသင်းကနေ ပေါင်သန်း ၃၀ နဲ့ ပြောင်းလာခဲ့တဲ့ မာဒူကီ ဟာ ချဲလ်ဆီးအတွက် ၉၂ ပွဲ ကစားပေးခဲ့သလို ကွန်ဖရင့်စ်လိဂ်ချန်ပီယံဆုနဲ့ ကလပ်ကမ္ဘာ့ဖလား ချန်ပီယံဆုတွေကို ရယူပေးနိုင်ခဲ့ပါတယ်။ မာဒူကီဟာ အခုနွေရာသီဈေးကွက်မှာ ကီပါ၊ ဇူဘီမန်ဒီ၊ နော်ဂတ် တို့ပြီးနောက် အာဆင်နယ်အသင်းခေါ်ယူတဲ့ စတုတ္ထမြောက် ကစားသမားလည်းဖြစ်ပါတယ်။(NVS 008)