တရုတ်နိုင်ငံ၊ ဟောင်ကောင်မြို့၌ ကျင်းပပြုလုပ်မည့် Food Expo Pro 2025 ပြပွဲတွင် မြန်မာနိုင်ငံမှ ပါဝင်ပြသရန် ဖိတ်ခေါ်ထားကြောင်း မြန်မာကုန်သွယ်မှုမြှင့်တင်ရေးအဖွဲ့ ကုန်သွယ်မှုဖွံ့ဖြိုးရေးဌာနခွဲမှ သိရပါတယ်။ Food Expo Pro 2025 ပြပွဲကို တရုတ်နိုင်ငံ၊ ဟောင်ကောင်မြို့ရှိ Hong Kong Convention and Exhibition Center ၌ ၂၀၂၅ ခုနှစ်၊ သြဂုတ်လ ၁၄ ရက်မှ ၁၆ ရက်အထိ သုံးရက်ကြာကျင်းပသွားမှာဖြစ်ပြီး မြန်မာနိုင်ငံမှ ကုမ္ပဏီလုပ်ငန်းရှင်များကို ပါဝင်ပြသရန် မြန်မာကောင်စစ်ဝန်ချုပ်ရုံး၊ ဟောင်ကောင်မြို့မှတစ်ဆင့် ဖိတ်ကြားထားတာဖြစ်ပါတယ်။ ပြပွဲတွင် မြန်မာနိုင်ငံမှ ကုမ္ပဏီလုပ်ငန်းများ ပါဝင်ပြသနိုင်ရန်အတွက် မြန်မာကောင်စစ်ဝန်ချုပ်ရုံး၊ ဟောင်ကောင် မြို့အတွက် ၉ စတုရန်းမီတာ အကျယ်အဝန်းရှိသော ပြခန်းတစ်ခန်းကို သက်ဆိုင်ရာမှ အခမဲ့စီစဉ်ဆောင်ရွက်ပေးသွားမှာ ဖြစ်ပြီး ပြပွဲကို သုံးရက်ကြာကျင်းပမှာဖြစ်ပါတယ်။ ပထမနှစ်ရက်တွင် ကုန်သည်၊ လုပ်ငန်းရှင်များကို ပြသမည်ဖြစ်ပြီး ပြပွဲနောက်ဆုံးရက်မှာတော့ ပြည်သူများလည်း ဝင်ရောက်ကြည့်ရှုလေ့လာနိုင်မှာဖြစ်ပါတယ်။ Food Expo Pro 2025 ပြပွဲတွင် မြန်မာကောင်စစ်ဝန်ချုပ်ရုံး၊ ဟောင်ကောင်မြို့အတွက် အခမဲ့စီစဉ်ပေးမည့် ပြခန်း၌ ပါဝင်ပြသလိုသည့် မြန်မာနိုင်ငံမှ စီးပွားရေးလုပ်ငန်းရှင်များအနေဖြင့် မြန်မာကုန်သွယ်မှုမြှင့်တင်ရေးအဖွဲ့ ကုန်သွယ်မှုဖွံ့ဖြိုးရေးဌာနခွဲ ဖုန်း-၀၆၇၄၀၈၆၂၃ နှင့် [email protected] သို့ ဆက်သွယ်စုံစမ်းနိုင်ကြောင်း သိရပါတယ်။(NVS-004)