ယခုနှစ် ငြိမ်းချမ်းရေးနိုဗယ်ဆုအတွက် အမေရိကန်သမ္မတ ဒေါ်နယ်ထရမ့် ကို အမည်စာရင်း ပေးသွင်းမည် ဖြစ်ကြောင်း ပါကစ္စတန်အစိုးရတာဝန်ရှိသူများက ပြောကြားခဲ့သည်။ ယခုနှစ် မေလအတွင်းဖြစ်ပွားခဲ့သည့် အိန္ဒိယနှင့် ပါကစ္စတန်ပဋိပက္ခကို ဖြေရှင်းရာတွင် ပါဝင်ကူညီ ခဲ့မှုကြောင့် သမ္မတ ဒေါ်နယ် ထရမ့် ကို ယခုနှစ်ငြိမ်းချမ်းရေးနိုဗယ်ဆုအတွက် အမည်စာရင်းပေးသွင်းရန် ပါကစ္စတန်နိုင်ငံက စီစဉ်ထားခြင်းဖြစ်သည်။ ငြိမ်းချမ်းရေးနိုဗယ်ဆုအတွက် ဒေါ်နယ်ထရမ့် ကို အမည်စာရင်းပေးထားခြင်းဖြင့် အစ္စရေး-အီရန် ပဋိပက္ခ၌ အမေရိကန်နိုင်ငံ တိုက်ရိုက်ပါဝင်မည့်အစီအစဉ်ကို ဒေါ်နယ်ထရမ့် အနေဖြင့် ပြန်လည်စဉ်းစားလာနိုင်ကြောင်း လေ့လာသူအချို့က သုံးသပ်ထားသည်။ ယခုနှစ် မေလ ၇ ရက်တွင် စတင်ခဲ့သော အိန္ဒိယနှင့် ပါကစ္စတန်ပဋိပက္ခမှာ အမေရိကန်နိုင်ငံ၏ ကြားဝင် ပေးမှုဖြင့် ပြီးဆုံးပြီဖြစ်ကြောင်း သမ္မတဒေါ်နယ်ထရမ့် က ကြေညာခဲ့သည်။ အိန္ဒိယနှင့် ပါကစ္စတန်တို့ကြား လေးရက်ကြာပဋိပက္ခမှာ အမေရိကန်နိုင်ငံ၏ သံတမန်ရေးအရ ကြားဝင်မှုကြောင့် ပြီးဆုံးခဲ့ရကြောင်း ပါကစ္စတန် နိုင်ငံက လက်ခံထားသည်။ သို့ရာတွင် ပါကစ္စတန်နှင့်ဖြစ်ပွားခဲ့သော လေးရက်ကြာပဋိပက္ခမှာ အမေရိကန်နိုင်ငံ၏ ကြားဝင်မှုကြောင့် ပြီးဆုံးခဲ့ခြင်းမဟုတ်ဘဲ အိန္ဒိယနှင့် ပါကစ္စတန် နှစ်နိုင်ငံသဘောတူညီချက်ဖြင့် ပြီးဆုံးခဲ့ခြင်းဖြစ်ကြောင်း အိန္ဒိယအစိုးရက ပြောကြားထားသည်။